बादलको टिप्पणीपछि प्रशासनको स्पष्टीकरण : मापदण्ड पालना गरेर सभा-सम्मेलन गर्न बन्देज छैन

काठमाडौं । आजदेखि गोदावरीमा सुरु भएको एमालेको विधान महाधिवेशनतर्फ लक्षित गर्दै जिल्ला प्रशासन कार्यालय काठमाडौंले विज्ञप्ति जारी गरेको छ ।

सहायक प्रमुख जिल्ला अधिकारी दीपक पौडेलले विज्ञप्ति जारी गर्दै स्वास्थ्य मापदण्डको पूर्ण पालना गरी गर्न र गराउनमा कुनै बन्देज नलगाइएको प्रष्टीकरण दिएका छन् ।

प्रशासनले बिहीवार आदेश जारी गर्दै आज बिहानदेखि राजधानीमा भीडभाड, जात्रा, महोत्सव गर्न नपाइने बताएको थियो । प्रशासनको आदेश लगत्तै एमाले स्थायी कमिटी सदस्य रामबहादुुर थापा बादलले प्रशासनको आदेश राजनीतिक प्रतिशोधले प्रेरित भएको बताएका थिए ।

एमालेको विधान महाधिवेशन हुनुको एकदिनअघि काठमाडौं उपत्यकाका तीनै जिल्ला प्रशासनले सभा, गोष्ठी र जुलुसलाई भर्चुअलरुपमा मात्र गर्न आदेश दिएका थिए । यसबारे सामाजिक संजालमा निकै टिकाटिप्पणी भएको थियो ।

‘उक्त आदेश कोभिड संक्रमण फैलन नदिनका लागि पालना गर्नुपर्ने स्वास्थ्य मापदण्ड र पूर्व सतर्कताका सम्बन्धमा मात्र जारी गरिएको हो’ प्रशासनको विज्ञप्तिमा उल्लेख छ ।

कोभिड संक्रमणको जोखिम यथावत रहेको बताउँदै प्रशासनले आदेश जारी गर्नुपरेको बताएको छ ।