आसिफसँग मिलेर टीकटक स्टार रेश्माले नेपाल आइडल होस्ट गर्ने

काठमाडौं । नेपाल आइडल चौंथो सिजनको औपचारिक घोषणा भएको छ । एपीवान टेलिभिजनले शुक्रबार शम्भुजित बाँस्कोटा, शिवानी मोक्तान र सुगम पोखरेललाई जजको रुपमा चयन गरेको छ ।

टीकटक स्टार रेश्मा घिमिरे पनि अब नेपाल आइडलमा प्रवेश गरेकी छिन् । तर, उनको यो प्रवेश होस्टको रुपमा भएको हो । रेश्माले अभिनेता एवं गायक समेत रहेका आसिफ साहसँग मिलेर गायन रियालिटी सोको चौंथो सिजनलाई होस्ट गर्नेछिन् ।

रेश्मालाई टीकटकमा १२ लाख जनाले पछ्याएका छन् । आसिफ र रेश्माले यसअघि केही म्युजिक भिडिओमा सँगै अभिनय पनि गरेका छन् । म्युजिक भिडिओको चर्चित जोडीलाई अब होस्ट जोडीको रुपमा हेर्न पाइने भएको छ ।

सो निर्देशक सुरेश पौडेलका अनुसार कोरोना महामारीको कारण यसपटक डिजिटल अडिसन आयोजना गरिएको हो । मंसिर २३ गतेदेखि प्रसारण थाल्ने जनाइएको छ ।