टाइगर सिक्वेल सुटिङ गर्न सलमान, कट्रिना र इमरान रुस प्रस्थान, पाँच देशमा पाँच एक्सन दृश्य छायांकन हुने

मुम्बई । कोभिड महामारीपछि बलिउड लयमा फर्कने तयारीमा छ । ठूला स्टारहरुले फिल्म छायांकन थालेका छन् । शाहरुख, अक्षयदेखि सलमान खानका फिल्मको सुटिङ सुरु हुँदैछ । यही मेसोमा सलमान खान र कट्रिना क्याफ ‘टाइगर ३’ छायांकनको लागि डेढसय कास्ट एण्ड क्रूसहित बुधबार रुसतर्फ प्रस्थान गरेका छन् ।

५ यूरोपेली देशका ५ भिन्न भिन्नै स्थानमा एक था टाइगरको तेस्रो सिक्वेल छायांकन हुने भएको छ । निर्माता आदित्य चोपडा सुटिङका लागि ४५ दिनको समय लिएर चार्टर्ड प्लेनसहित युरोपमा निस्किएका छन् ।

रुससहित टर्की र अस्ट्रियामा फिल्म सुटिङ हुने भएको छ । साथै दुई युरोपेली देशहरुमा पनि छायांकन गर्ने योजना छ । भारत र पाकिस्तानबीचको जासूसी कथामा आधारित रहेको यो फिल्ममा सलमान, टाइगर र इमरान हाशमी मुख्य पात्रमा देखिनेछन् । अघिल्ला फिल्ममा सिरियल किसर बनेका इमरान यसमा भने भिलेनको रुपमा प्रस्तुत हुँदैछन् । उनी भिलेन बन्ने कुराले अहिले चर्चा बटुलिरहेको छ ।

सलमान र कट्रिना पछिल्लो दुई भागमा टाइगर र जोयाको चरित्रमा देखिएका थिए । महत्वपूर्ण कुरा के छ भने यो फिल्ममा भने शाहरुख खान अतिथिको भूमिकामा रहनेछन् । शाहरुखले केमियो रोलको छायांकन सकेका छन् ।

पाँच एक्सन सीक्वेन्सको लागि कट्रिनाले ६०, एमरान हाशमीले ४५ र सलमान खानले ३५ दिने तालिम लिएका छन् । हाशमीले आफ्नो पात्र लुक्समा प्रस्तुत हुने दुई वर्षदेखि बडी सेप बनाइरहेका छन् ।

आगामी नोभेम्बरभित्र फिल्म छायांकन सक्ने तयारी छ । टाइगर सिक्वेल सकिएपछि सलमानले फरहाद सामजीको फिल्म ‘भाईजान’ को छायांकन गर्नेछन्। उक्त फिल्मको नाम पहिला ‘कभी ईद, कभी दीवाली’ थियो।

यसमा पूजा हेगडे उनको अपोजिट छन् भने राकुमार गुप्ताको फिल्म ‘ब्ल्याक टाइगर’ को लागि सलमान व्यस्त हुनेछन् । त्यस पछि, उनी सूरज बड़जात्या र साजिद नाडियाडवालाद्वारा निर्देशित फिल्म पनि गर्ने भारतीय संचारमाध्यमले जनाएका छन् ।