महामारी प्रभावितलाई राहत दिन चलचित्र विकास बोर्डले माग्यो ५० करोड

काठमाडौं । कोरोनाभाइरस महामारीले थलिएको नेपाली फिल्म क्षेत्रलाई राहत प्रदान गर्न चलचित्र विकास बोर्डले सरकारसँग ५० करोड रुपैयाँ मागेको छ ।

प्रदर्शन हुन बाँकी रहेका फिल्म, बन्द रहेका सिनेमा घर र प्राविधिकलाई राहत दिन उक्त रकम माग गरिएको बोर्ड सदस्य प्रकाश भट्टराईले बताए
। सरकारले यो रकम उपलब्ध गराए फिल्म क्षेत्रलाई राहत पुग्ने उनले जनाए ।

प्रदर्शन रोकिएका फिल्मलाई १५ करोड, फिल्म हललाई ३० करोड र श्रमजीवि फिल्मकर्मीको लागि भन्दै बोर्डले ५ करोड रुपैयाँ राहत मागेको हो । बोर्डका अनुसार ३४ फिल्म प्रदर्शनका लागि तयारी अवस्थामा छन् ।

बोर्डका अनुसार ११८ हल महामारीको कारण बन्द छन् । बजेटमा फिल्मबारे उल्लेख भएपनि त्यो पर्याप्त नभएको भन्दै बोर्डले सरकारसँग राहतको माग गरेको हो ।