नेपाली मुलकी अस्मिता बेलायतको फुटबल क्लब टोटनह्याम हट्सपरमा आवद्ध

काठमाडौं । नेपाली मुलकी किशोरी अस्मिता आले बेलायतको फुटबल क्लव टोटनह्याम हट्सपरमा आवद्ध भएकी छन् । १९ वर्षिया अस्मितासँग सन् २०२३ सम्मका लागि सम्झौता गरेको क्लवले जनाएको छ ।

बेलायतमै बस्ने अस्मिताले डिफेन्डरको रुपमा खेल्दै आएकी छन् । उनी यसअघि एस्टोन भिल्लाकाे युवा टिमबाट खेल्ने गर्थिन् । अहिले उनी टोटनह्यामकाे पहिलो रोजाइको महिला टिमको एक प्रमुख सदस्य बनेकी छन् । उनले १३ नम्बरको जर्सी लगाउनेछिन् ।

अस्मिताले बेलायतको युवा टिमबाट पनि खेलेकी छिन् । सन् २०१९ मा स्कटल्यान्डमा आयोजित यूरोपियन च्याम्पियनसीपको फाइनलसम्म पुगेको ईंग्ल्यान्ड अन्डर १९ टिममा उनी महत्वपूर्ण सदस्य थिइन् । टोटनह्याम हट्सपरको सिनियर टिममा मौका पाएपछि अस्मिताले खुशी व्यक्त गरेकी छन् ।

‘मलाई सुरु गर्न हतार भइरहेको छ,’ उनले भनिन्, ‘आशा गर्छु कि म यो सिजनमा टिमलाई माथि उठाउन सहयोग गर्न सक्छु ।’ भुपू गोर्खा सैनिकी छोरी अस्मिता ८ वर्षकै उमेरमा एस्टोन भिल्लाको एकेडेमीमा आवद्ध भएकी थिइन् । प्रिमियर लिग खेल्ने टिममा स्थान बनाउने उनी नेपाली मुलकी पहिलो खेलाडी हुन् ।

(*यसअघि प्रकाशित समाचारमा तथ्यगत त्रुटी भएकाले सच्याइएको)