पाँच महीनामा २ लाख संक्रमित थपिने सरकारको प्रक्षेपण

काठमाडौं । स्वास्थ्य मन्त्रालयले आगामी पाँच महीनामा झन्डै २ लाख कोरोनाभाइरस संक्रमित थपिन सक्ने प्रक्षेपण गरेको छ । त्यसमध्ये ९ हजार ६ सय ९३ लाई आइसीयूमा राख्नुपर्ने अवस्था आउन सक्ने मन्त्रालयले जनाएको छ ।

प्रतिनिधि सभा अन्तर्गतको शिक्षा तथा स्वास्थ्य समितिमा बोल्दै मन्त्रालयका प्रवक्ता डा. कृष्ण पौडेलले सो जानकारी गराएका हुन् । प्रक्षेपणमा साउनमा ५३ हजार ३०७, भदौमा ४५ हजार ७२६, असोजमा ३८ हजार ५९७, कात्तिकमा ३१ हजार ४४ र मंसिरमा २५ हजार १८३ जना नयाँ संक्रमित थपिने उल्लेख छ। संक्रमितमध्ये ८० प्रतिशत सामान्य, १५ प्रतिशत जटिल र ५ प्रतिशत गम्भीर हुने अनुमान स्वास्थय मन्त्रालयले गरेको छ ।