भुटानले दिने ३ लाख डोज कोभिसिल्ड खोप शनिबार काठमाडौं आइपुग्ने

काठमाडौं । भुटानले पैंचोमा दिन लागेको ३ लाख डोज अस्ट्राजेनेका (कोभिसिल्ड) खोप शनिबार काठमाडौं आइपुग्ने भएको छ ।

चार्टर्ड फ्लाइटबाट सो परिमाणको खोप आउन लागेको जानकारी स्वास्थ्य मन्त्रालयले दिएको छ । उक्त खोप यसअघि कोभिसिल्डको पहिलो डोज लगाएका ६५ वर्षमाथिका ज्येष्ठ नागरिकलाई दिइने भएको छ ।

मुलुकका १६ लाख ज्येष्ठ नागरिक कोभिसिल्ड खोपको दोस्रो मात्राको पर्खाइमा छन् । भुटानबाट आउन लागेको उक्त खोपको म्याद ग्रुजने मिति नजिकै भएकाले कुनै ढिलाइ बिना लगाउने तयारी भैरहेको जनाइएको छ ।

स्वास्थ्य राज्यमन्त्री उमेश श्रेष्ठले यसअघि भुटानबाट आउने खोप १७ दिनभित्र लगाइसकिने बताएका थिए । जापानले दिने भनेको १६ लाख डोज अस्ट्राजेनेका खोप चाँडै आउने जानकारी काठमाडौंस्थित जापानी दूतावासले जनाएको छ ।