खोप प्रमाणपत्रको पैसा नलिन अस्पताललाई स्वास्थ्य मन्त्रालयको निर्देशन

काठमाडौं । स्वास्थ्य तथा जनसंख्या मन्त्रालयले खोप प्रमाणपत्रको पैसा नलिन अस्पतालहरुलाई निर्देशन दिएको छ ।

बैदेशिक रोजगारी एबम अन्य कामको शिलशिलामा अन्तर्राष्ट्रिय यात्रा गर्नुपर्ने नागरिकहरुलाई कोभिड -१९ बिरुद्धको खोप लगाएको प्रमाण पत्र जारी गर्दा रकम नलिन मन्त्रालयले निर्देशन दिएको हो ।

मन्त्रालयले गत साउन ७ गतेको सचिवस्तरको निर्णय अनुसार खोप लगाएको प्रमाणीकरण निःशुल्क गर्ने निर्देशन दिएको थियो । तर केही अस्पतालहरुबाट शुल्क लिएको जनगुनासो आएपछि कोभिड- १९ बिरुद्धको खोप लगाएको प्रमाणीकरण निशुल्क गर्न निर्देशन गरेको वरिष्ठ जनस्वास्थ्य प्रशासक भीमप्रसाद सापकोटाले बताए ।

खोप प्रमाणीकरण गर्नको लागि उपत्यकाको ४ वटा अस्पतालहरु तोकिएको छ । शुक्रराज ट्रपिकल तथा सरुवा रोग अस्पताल टेकु, निजामती कर्मचारी अस्पताल मिनभवन, पाटन अस्पताल लगनखेल, र सशस्त्र प्रहरी अस्पताल, बलम्बुबाट खोप प्रमाणीकरणको काम भइरहेको छ ।