कोरोनाविरुद्ध खटिन १ हजार ७७ जना जनस्वास्थ्य इन्चार्ज नियुक्त गरिने

काठमाडौं । कोरोनाभाइरस संक्रमणको जोखिम नियन्त्रणमा खटिन स्वास्थ्य मन्त्रालयले १ हजार ७७ जना जनस्वास्थ्य निरीक्षक नियुक्ति गर्ने भएको छ । यस सम्बन्धी कार्यविधि असार १४ गतेबाट लागु भएको र सोहीअनुसार कर्मचारी नियुक्त गर्न लागिएको स्वास्थ्य मन्त्रालयले जनाएको छ ।

प्रवक्ता डा. कृष्णप्रसाद पौडेलका अनुसार काठमाडौं महानगरपालिकामा ७ जना, अन्य नगरपालिकामा ५-५ जना, उपमहारनगरपालिकामा २ जना र गाउँपलिकामा १ जना गरी देशको ७५३ वटा स्थानीयतहमा नियुक्त गरिने भएको छ ।

निरीक्षकहरुले स्वास्थ्यका मापदण्ड पालना गराउन, उच्च जोखिम रहेका क्षेत्रमा अनुगमन गर्न, स्वास्थ्य सम्बन्धी परामर्श दिन, मापदण्ड नमान्नेलाई कारबाही गर्न, जोखिम क्षेत्रको प्रतिवेदन तयारी गर्ने लगायतका कामहरु गर्नुपर्ने छ ।

स्वास्थ्य सेवा विभागले करारमा नियुक्ति गरी खटाउन पाउने कार्यविधिको व्यवस्था गरेको छ । अधिकृत सातौं तहको सेवा सुविधा र ५० प्रतिशत जोखिम भत्ता गरी मासिक ५६ हजार ७६५ रुपैयाँ तलब तोकेको छ । निरीक्षकहरुलाई स्वास्थ्य बिमा अनिवार्य गरी कामको सिलसिलामा कोरोना संक्रमण भए सम्पूर्ण उपचार नेपाल सरकारले व्यवहार्ने भएको छ ।