डिभोर्सपछि सँगै देखिएका आमिर र किरणले भने : हामी खुशि छौं !

मुम्बई । वैवाहिक सम्बन्ध अन्त्य भएको घोषणा गरेपछि पनि बलिउड अभिनेता आमिर खान र पत्नी किरण राव सँगै देखिएका छन् । भिडियो लाइभमार्फत उनीहरु एकसाथ प्रस्तुत भएका हुन् ।

पानी फाउन्डेसनको कार्यक्रममा सँगै भेटिएका उनीहरुले डिभोर्सपछि पनि आफूहरु खुशि भएको बताएका छन् । शनिबार १५ वर्षको वैवाहिक सम्बन्धलाई टुंग्याउने घोषणा उनीहरुले गरेका थिए ।

‘तपाईंहरुलाई चित्त दुःख होला । कतिपयलाई मन नपरेको पनि होला । तर, हामीहरु खुशि छौं । हाम्रो सम्बन्धमा केही परिवर्तन आएको हो तर, हामी दुई एकसाथ छौं । हाम्रो खुशिको लागि तपाईंहरुले प्रार्थना गर्नूहोस’ आमिरले भिडिओमा भनेका छन् ।

किरणले भने भविष्यमा पनि आफूहरु मिलेर काम गर्ने बताएकी छिन् । ‘तपाईंहरुलाई आश्वासन दिन चाहन्छौं कि हामी दुईसँगै काम गर्न चाहन्छौं’ किरणले भनेकी छिन् । सन् २००५ मा विहे गरेको यो जोडीले शनिबार वैवाहिक सम्बन्धलाई टुंग्याउने घोषणा गरेको थियो ।

वक्तव्यमा उनीहरुले आफूहरुको तर्फबाट सन्तानको रुपमा रहेका छोरा आजादलाई समान अभिभावकत्व दिने समेत जनाएका थिए । साथै, उनीहरुले दुई फिल्म र पानी फाउन्डेसनमा पनि मिलेर काम गर्ने उल्लेख गरेका थिए ।

किरण र आमिरको भेट पहिलोपटक फिल्म लगानको सेटमा भएको भारतीय संचारमाध्यमले जनाएका छन् ।