चीनबाट अर्को साता ल्याइने खोप ५५ वर्ष माथिकालाई लगाउने तयारी

काठमाडौं । चीनबाट अर्को साता ल्याइने भनिएको १० लाख डोजभन्दा बढी खोप ५५ वर्षभन्दा माथिका नागरिकलाई दिने तयारी भएको छ ।

स्वास्थ्य मन्त्रालय अन्तर्गतको खोप महाशाखाका प्रमुख डा. झलक गौतमले दोस्रो प्राथमिकतामा राखिएका उक्त समूहका नागरिकलाई खोप दिने तयारी भएको जनाए ।

उक्त उमेर समूहमा कतिजनाले खोप लगाउन पाउनेछन् भन्ने तथ्यांक संकलन भैरहेको उनले जनाए । यसअघि ६० देखि ६४ वर्ष उमेर समूहका ज्येष्ठ नागरिकलाई सरकारले खोप लगाएको छ ।

६० भन्दा माथिका झन्डै १४ लाखले कोभिसिल्ड खोप लगाएका छन् । साथै, चीनबाट अब आउने खोप अत्यावश्यक तथा जोखिम क्षेत्रमा काम गर्ने मानिसहरुलाई लगाइने तयारी समेत भएको गौतमले जानकारी दिए ।

कोभिसिल्ड खोप लगाएकाले चिनियाँ खोप भेरोसेल लगाउन हुन्छ कि हुँदैन भनेर सोधिएको प्रश्नमा उनले कोभिसिल्ड लगाएकाले कोभिसिल्ड खोप नै लगाउनुपर्ने बताए । ‘उस्तै फर्मुलमा बनेको मात्र खोप लगाउनुपर्छ’ उनले भने ।