२५० फिल्म प्राविधिकलाई करिश्मा र पलले बाँडे राहत, नेफ्टाको अगुवाइमा सक्रिय भए फिल्मकर्मी

काठमाडौं । लकडाउनले हातमुख जोर्न धौ-धौ भएका फिल्म प्राविधिकलाई सघाउन सेलेव्रिटी जुटेका छन् । चलचित्र प्राविधिक संघको अगुवाइमा कलाकारले सहयोगी हात अघि बढाएका हुन् ।

संकटको समयमा अभिनेत्री करिश्मा मानन्धर सँधै प्राविधिकको हितमा उभिने गर्छिन् । यसपटक भने उनी राहत वितरण गर्दै देखिइन् । करिश्मासँगै अभिनेता पल शाहले पनि प्राविधिकलाई खाद्यान्न राहत वितरण गरे ।

उनीहरुले २५० भन्दा बढी फिल्म प्राविधिकलाई राहत वितरण गरे । लप्पन छप्पन फिल्म निर्देशक मुकुन्द भट्ट, चिनियाँ वितरक शान्त शर्मा र निर्माण नियन्त्रक युवराज कार्कीको पहलमा ताइवानी मास्टर हिगुवाङ सीले राहत वितरण गरेका हुन् ।

संघका अध्यक्ष पुष्कर लामाले महामारीले दुःखमा परेका प्राविधिकलाई आर्थिक र सामाजिक राहतका लागि सक्रियता जनाइरहेका छन् । उनकै पहलमा डायस्पोरामा रहेका फिल्मकर्मीले पनि गच्छेअनुसार सहयोग प्रदान गरिरहेका छन् ।

साथै, आरजे राहना इन्टरटेनमेन्टले प्राविधिक संघको विपद व्यवस्थापन कोषलाई ७५ हजार रुपैयाँ सहयोग उपलब्ध गराएको छ ।