फिल्म उद्योगको एक अर्ब लगानी जोखिममा, ४० हल सँधैको लागि बन्द हुने

काठमाडौं । कोरोनाभाइरस महामारीको कारण नेपाली फिल्म क्षेत्रले अर्बौं क्षति व्योहोर्ने देखिएको छ ।

चलचित्र घरहरुको छाता संस्था नेपाल चलचित्र संघको पछिल्लो तथ्यांकअनुसार भाइरस रोकथामका लागि लागु गरिएका प्रतिबन्धको कारण आर्थिक क्षति पुगेको हो ।

दुईवर्ष अघिदेखि ४० भन्दा बढी फिल्म निर्माण सम्पन्न भइ प्रदर्शनको तयारीमा रहेको र ती फिल्ममा भएको लगानी हेर्दा १ अर्बभन्दा बढी रकम जोखिममा रहेको जनाइएको छ ।

करिब २२ वटा फिल्म हल सँधैको लागि बन्द भएको र बन्द हुने हलको संख्या ४० पुग्ने चलचित्र संघले जनाएको छ । ती फिल्म हलमा खर्बौं लगानी रहेको जनाइएको छ ।

फिल्म क्षेत्रमा आबद्ध कलाकार, प्राविधिक, लेखक, संगीतकार, गायक र गायिका बेरोजगार भएको समेत उल्लेख छ । साथै, महामारीअघि निर्माण भएका फिल्ममा वितरकले गरेको लगानी समेत जोखिममा रहेको चलचित्र संघले जनाएको छ ।

संघका महासचिव तथा फिल्म निर्माता एवं निर्देशक अशोक शर्माले कोभिड प्रभावित फिल्म क्षेत्रका लागि सरकारले आर्थिक प्याकेज ल्याउनुपर्ने बताउँछन् । विज्ञसँग छलफल गरी ५ तथा १० वर्षे आर्थिक योजनाका कार्यक्रम ल्याउनुपर्ने समेत शर्माले माग गरेका छन् ।