युरो २०२० का लागि पोर्चुगलको टोली घोषणा, रोनाल्डो पाँचौं पटक खेल्दै
एजेन्सी । अर्को महिना विभिन्न शहरमा हुने युइएफए युरोका लागि साविक विजेता पोर्चुगलको टोली घोषणा भएको छ । मुख्य प्रशिक्षक फर्नान्डो सान्तोसले पाँच पटकका बालोन डी’अर विजेता क्रिस्टियानो रोनाल्डको कप्तानीमा २६ सदस्यीय टोलीको घोषणा गरेका हुन् ।
सन् २००४ मा पोर्चुगलले नै आयोजना गरेको संस्करणमार्फत् प्रतियोगितामा ‘डेब्यू’ गरेका स्टार फरवार्ड रोनाल्डो लगातार पाँचौं संस्करण खेल्दै छन् ।
२००४ मा फाइनलमा पुगेर घरेलु मैदानमा ग्रीससँग पराजित भएको पोर्चुगलले २०१६ मा फ्रान्सलाई उसकै मैदानमा पराजित गर्दै पहिलो पटक युरो जितेको थियो ।
रोनाल्डोको नेतृत्वमा सम्भवत: अन्तिम युरो खेल्ने तयारीमा रहेको पोर्चुगलको टोलीमा युवा खेलाडी जुवाओ फेलिक्सले पनि स्थान बनाएका छन् ।
समूह एफमा रहेको पोर्चुगलले जुन १५ मा हंगेरीसँग खेल्दै प्रतियोगिताको सुरुआत गर्नेछ । युरोपेली फुटबलका पावर हाउसहरू फ्रान्स र जर्मनीसमेत सोही समूहमा रहेकाले समूह चरणमै सेमिफाइनल समान प्रतिस्पर्धा हुने निश्चित छ ।
पोर्चुगलको टोली:
गोलकिपर्स: एन्थोनी लोपेज, रुइ पेट्रिसियो, रुइ सिल्भा
डिफेन्डर्स: जुवाओ कान्सेलो, नेल्सन सेमेडो, जोसे फोन्ट, पेपे, रुबेन डियाज, नुनो मेन्डेज, राफाइल गुरेइरो
मिडफिल्डर्स: डानिलो परेइरा, जुवाओ पल्हिन्हा, रुबेन नेभेस, ब्रुनो फर्नान्डेज, जुवाओ माउटिन्हो, रेनाटो सान्चेज, सर्जियो ओलिभेरा, विलियम कार्भल्हो
अट्याकर्स: प्रेडो गोन्काल्भेस, एन्ड्रे सिल्भा, बर्नार्डो सिल्भा, क्रिस्टियानो रोनाल्डो, डिएगो जोटा, गोन्कालो गुइडेज, जुवाओ फेलिक्स, राफा सिल्भा